Ua faamaonia mai le pu’e ma taofia faapagota ai e leoleo o nisi e to’avalu, i le mae’a ai o se galuega tele a le auaunaga a leoleo ua faaigoaina o le Operation Diablo; na faatautaia lea ina ia talepe ma taofia gaioiga faasolitulafono auaufaatasi o loo faatino i le tele o itu o Southland (organised criminal activity).
Mai lea matāupu, na ta’ua i faamatalaga a le Southern District Police, e fapea e 12 tusi faataga poo search warrants na faaaogā mo a latou sa’ili’iliga i nisi o fale ma nofoaga ma taavale i totonu ma isi faaitu o Invercargill.
O gaioiga o loo iai sootaga i kulupu poo gangs ma lo latou auai i faatinoga o loo fesoota’i atu i fuālaau faasāina.
I le galuega na maua ai le silia ma le 32 kalama o le mamafa o le ‘aisa o le methamphetamine, o le tele o maruana, o laau malosi ma ututau, ma le tinoitupe e silia ma le $3,000 faapea ai ma masini eletoroni.
E to’alima alii, ma tama’ita’i e to’atolu ua tula’i i le Faamasinoga Faaitumalo o Invercargill, tula’i i moliaga o le umiaina ma le tufatufaina atu o fuālaau faasāina o loo i lalo o faatulagaga ua ta’ua o le class A and class C drugs, o moliaga o le umia faasolituafono o laau malosi ma le faia o uiga taufaamata’u.
O loo iai le talitonuga a leoleo e ono iai nisi e toe maua ma molia i lea lava matāupu.
Puna o Faamatalaga: https://www.facebook.com/share/p/17aNeVa3VR/
