A o faai’ui’u ai galuega fai o lenei tausaga, o lea ua faalauiloa mai le auai o nisi o sui o le Pasefika i Niu Sila nei, ua faamauina ma ua faamaonia le amana’ia ai mo a latou galuega fītā ma le mata’ina mo le lautele, e pei ona faamauina e to’avalu i latou ua fa’amanuiaina i lea fa’aaloalo maualuga i le atunuu.
O le tasi o i latou nei o le alii iloga i le taaloga lakapi mo le tele o tausaga, o lē sa avea ma alii taalo o le ‘au tele o le All Blacks, le alo o Samoa ia Saveatama Eroni Clarke, ua amana’ia nei i le pine taualoa o le New Zealand Order of Merit, mo lana tautua e ala i tagata pasefika, o le taaloga lakapi ae faapea foi lana ta’ita’iga ma galuega i le faalauiloaina ai o aafiaga o le soifua maloloina i le mafaufau.
Faamauina i ripoti mai le leitio faavaomalo a Niu Sila, le agaga fiafia o Saveatama i le fa’aeaea ma le faaaloalo ua ia maua ma na ia ta’ua o lea amana’ia e lē na o ia, ae o si ona aiga aemaise lona faletua ia Siala mo le fesoasoni ile tele o tausaga.
O i latou ua maua lea faaaloalo o le New Zealand Order of Merit e aofia ai Mokafetu Smith mo lana tautua i galuega tau faatufugaga faalepasefika, o Jade Carlo Farrar mo lana tautua i le fesoasoni ia i latou o loo iai aafiaga tumau o le soifua ma le fesoasoani atu lea i tagata pasefika.
O le tamaitai polofesa ia Tracie Mafile’o mo lana tautua i le pasefika ma a’oa’oga maualuluga.
O sui o le Pasefika ua o latou mauaina le faailoga tauāloa o le King’s Service Medal e aofia ai i Aere Anne Nicholas, Cheryl Talamaivao, Reverend Wayne Saunoa Moegagogo Toleafoa, ma Enatuleni Ikitoa Polima, ua ave iai lea fa’aaloalo ona o le tautua matavela ua o latou faia mo a latou tagata pasefika i le atunuu.
Puna o Faamatalaga: https://www.rnz.co.nz/international/pacific-news/582935/eight-pasifika-recipients-in-new-year-honours
