E toavalu sui tauva Pasefika ua faamanuiaina ma e toatele ai lava sui o le Labour.
Peitai o le iuga o loo iai mai le faitauga lē aloaia e fai lava si vavalalata o palota e va ai ma isi sui, ma e ono suia i le mae’a faitau o palota faapitoa.
E ese mai sui o le Labour, e toatasi le sui Pasefika o le National ma le toalua o le Greens.
O le sui e toatasi o le National o Angee Nicholas, na manumalo mai le itumalo faapalota o Te Atatu.
O ia o se tagatanuu mai le Atu Kuki, o le uluai taimi lenei ua momo’e ai i le faigāpalota ma e na o le 30 palota o loo sili ai i le sui o le Labour, o Phil Twyford.
O sui faamanuiaina na tamomo’e i lalo o le fu’a a le Labour, na mamao le manumalo a Barbara Edmonds, mai Mana i Ueligitone.
O Carmel Sepuloni ua toe tulai mai Kelston.
O Jenny Salesa mai Panmure-Otahuhu, poo le itumalo lea na tele ina tulimataia e le toatele ona o lea na tamomo’e faatasi mai ai ma Faanana Efeso Collins, o le sui o le Greens.
E 10,000 ma ono tupu palota na sili ai Salesa.
E ui la e lē o manuia Faanana, ae ono iai lona avanoa i le maota ona o lea e lona 11 i le lisi a la latou vaega faaupufai.
O Tangi Utikeke ua faamanuiaina mai Palmerston North, ua manumalo ai i le sui o le Greens, o Teanau Tuiono, ma e ui foi la e lē o manuia Tuiono mai le itumalo, ae ono iai pea lona avanoa i le Palemene e tauala mai lana pati o le Greens, lea o loo lona lima ai i le lisi.
Ma le sui o Magele, o lea foi ua toe faamanuiaina ai se tasi o alo o Samoa, Lemauga Lydia Sosene.
O lea sa tele lava fesili pe faamata e mafai e Sosene ona ia taofia pea le nofoa o Magele e faaauau mai ia Aupito Su’a William Sio lea na ia tauavea mai le 2008 seia oo mai i le tausaga nei.
Mai sui e toavalu o le Pasefika ua faamanuiaina, o Lemauga Lydia Sosene o le Labour ma Angee Nicholas o le National, o i laua nei e maoa’e ai lava pe a fua o lo la uluai taimi lea ua tauva ai.
