E to’atolu tama taalo a le Manu Samoa ua maua avanoa i le au a le Moana Pasifika e taaalo ai i le taamilosaga o le Super Rugby Pacific i le tausaga fou.

O i latou ia e to’atolu e aofia ai Neria Fomai, Tomasi Alosio ma Henry Taefu. O i latou foi ia na taaalo i le taaloga a le Manu Samoa ma le Maori All Blacks lea na faia i Niu Sila ia Iulai o le tausaga nei.

O Neria Fomai 29 tausaga le matua ma e 60 taaloga mo le ai Lakapi taitoafitu na taalo ai lea alii mo Samoa ma e tele foi nisi o kalapu Lakapi i Niu Sila na taalo ai e pei o le Hawkes Bay Magpies.

O Tomasi Alosio e silia ma le 200 ana taaloga na taalo ai mo le au taitoafitu a Samoa ma ua faamauina foi o se tagata o loo i to’a 15 pito i luga e faia sikoa mo Samoa ma le aofai e 391 (points). Na toe foi mai lea alii i lona aiga i Ueligitone ma toe taalo ai i le au a le Wellington Lions mo le uluai taimi talu mai le tausaga e 2015.

O le alii ia Henry Taefu ua iloga ana taumafaiga mo le au a le atunuu le Manu Samoa, na taalo i le Pacific Nationa Cup i le tausaga e 2017 ma le 2019 sosoo ai ma le Ipu o le lalolagi i lea lava tausaga. 

O i latou nei ua faaopopo atu i le lisi o le au tuu faatasi a le Moana Pasifika e aofia ai ma tama taaalo mai Tonga ia Sione Tuipulotu ma Solomone Funaki.

Ao maua ai avanoa a nei tama taaalo a le atunuu e auai ai i le taamilosaga tele a le Super Rugby Pacific i le tausaga fou ua faagasolo nei le faamasinoga a se alii lakapi a le atunuu masalomia ai lona faaoolima i se alii 18 tausaga le matua ma taumafai e faalafi lona tino ona o masalosaloga ua uma le ola o lē na aafia mai lana tu’i.

O Johnny Vaili ua faamālōlō nei mai taaloga Lakapi uma mo le 6 masina ina ua maea se faalavelave muamua na tuuaia ai i lona faaoolima i laga paaga. 

O le vaiaso nei e tulai ai o ia i luma o le faamasinoga e tali ona moliaga. 

O alii taaalo uma ia a le Manu Samoa sa taaalo faatasi ma le alii lakapi ia Sean Wainui o le au a le Maori All Balcks i le tausaga nei lea ua uma lona ola ona o se faalavelave tau taavale.