Ua ioe alii e toatolu na faaoolima i le alii mai le atunuu o Bangladdesh i moliaga o le faaoomanu’a tuga.
O Vavega Fomai 27 tausaga le matua, o Senetoa Senetuli 21 tausaga ma Posala Kaisa 19 tausaga le matua o Vaitele Fou e faapea o le aso 5 o Aokuso o le tausaga nei i vaitele Fou lava na o latou faaoo ai manu’aga tuga i se alii Bangladesh e faigaluega i se faleoloa i Vaitele Fou.
Na faailoa e ia alii talavou i le Faamasinoga ananafi sa aafia latou i le ava malosi a o faia ai le gaioiga lea ua molia mai ai.
O le molimau a se tasi na ia aveina le alii Bangladesh i le falemai i lea po, o talavou nei na agai atu faatasi ma le alii na aafia i le faleoloa, ma vaaia ai e i latou nei o umia e lea alii ni tupe o le ala lea na mulimuli mai ai loa i lē na aafia ma faaoolima iai ae fao tupe.
O ia gaioiga uma na maua uma lea i mea pueata o le faleoloa.
O isi moliaga o ia tupulaga talavou ua faaui i tua e le itu a leoleo ona o lea ua ioeina le moliaga autu o le faaoomanu’aga tuga.
O lea mataupu ua toe tolopo atu i le vaiaso fou seia aumai se lipoti mai le vaega o ava malosi e tusa ai o le aafiaga sa iai lea aualii i le taimi na faatino ai le faaoogalima.
