Ua faailoa le siitia ai o le fuainumera o aulakapi o lea ua auai i le taitoafitu a Malisi ua faaigoaina o le Malisi Pacific Seven Tournament.
Ua faamanino mai e 10 ‘au e malaga mai i Samoa, e 5 ‘au mai Fiti, tasi le ‘au a Malisi mai Amerika Samoa, o loo iai ma le ‘au mai Tonga faatasi ai ma ‘au i totonu lava o Niu Sila nei, e aofia ai Bay of Plenty, Hamilton, Rotorua ma Hawkes Bay.
O le siitia maualuga o ‘au ua malaga mai fafo atu o Niu Sila ua silasila ai le komiti faafoe o lenei taamilosaga ua tele se avanoa e faalautele atu ai i tua le tautua a Malisi e ala i lenei taamilosaga.
Ae o se avanoa lelei e omai ai tama taaalo mai kalapu ma atunuu eseese e faasoa le latou malamalama i lenei taaloga o le lakapi, ma ia maua se avanoa e siitia ai le iloa o le tama lakapi i se isi tulaga e sili atu.
O le aso 18 o Novema o le a faataunuuina ai lea taamilosaga, ma o le a tele nisi o sponsors o le a auai.
O le a faatasi atu ai foi le Moana Pasifika i le 12.30 i le 1.30 e lagolago malosi lenei faamoemoe a Malisi e ala lea i mitiafu ma polo lakapi o le a tufatufa ai i le malae mo le mamalu o le atunuu, o le a auai atu ai foi le Pacific Family Health Group e galulue faatasi ai i lea aso auā le soifua maloloina o tama tane, faapea nisi o kamupani o le a auai.
E 24 le aofaiga o ‘au ma e 3 Pools o le a vaevaeina iai le taamilosaga.
O le fuafuaga a le komiti a Malisi o le aso 15 o le a faia ai le se’i mo ‘au taitasi e iloa ai le Pool e tatau ona taalo ai le ‘au faatasi ai ma le fono ma faiaoga ma taitai o ‘au taitasi a o loma ai le amataina o le taamilosaga i le aso 18 i lona Aso Toanai.
