E toafā alii ae toalua tamaitai o loo taofia nei i le falepuipui i Tanumalala i le vaaiga a leoleo ina ua mae’a ni osofaiga a leoleo i Siusega, Malie ma Leauvaa lea sa maua ai nakoti o le pauta faasāina o le aisa e tusa le aofaiga atoa pe a tuufaatasi e 16 tesimale 41 kalama le mamafa.
O le tasi o nofoaga na agai iai le galuega a leoleo na maua ai aisa o le mamafa e 13 tesimale 18 kalama ae o le isi nofoaga e 3 tesimale 23 kalama.
Na maua ai foi e leoleo se tinoitupe e 8 afe tala faapea aupega o laau malosi ma ututau.
O le taunuu manuia o lea sailiga a leoleo e mafua i le lagolago atu a le atunuu lautele, ma o le tatalo lea o loo ave pea, o le faailoa atu e tagata o nofoaga o loo natia ai faiga solitulafono e fesootai i le umia o laau ma pauta faasāina.
O lea solitulafono sa tautalagia e le toatele o sui faipule i le Palemene talu ai nei, ma o le finagalo foi lea o le ta’ita’i o le Itu Agai i le feiloa’iga masani ma tusitala, na te lagolagoina le tatau ona faia su’ega poo test mo sui uma o le Palemene.
O le matagaluega o leoleo, falepuipui ma le toe fuata’ina o le uluai auaunaga lea a le Malo o le a faatino ai su’ega mo malu o le Malo ina ia iloa poo aafia nisi i le faaaogāina o nakoti.
Ua faailoa e le Komesina o le matagaluega i se lipoti, a lē o le masina fou o Aokuso poo Setema e amata ai ona faatino ia su’ega poo drug test mo alii ma tamaitai leoleo.
