covid samoa
Tamaita'i Tausima'i ia Siasau Aiono ma la latou vaega o loo faatino tuiga mo le atunu'u i le Maota gasegase o Tupua Tamasese Meaola i Motootua.

Toalua ua faaopoopo i ē maliliu ona o le Koviti-19 i Samoa

Tusia: Maina Misa Fomai’i-Vai 

E toalua ua faamaonia mai e le Matagaluega o Soifua Maloloina ua faaopoopo atu i le 20 o tagata, ua maliliu ona o le Koviti-19 i le atunuu. O se alii 36 tausaga le matua o le soifua na uma lona ola i se taimi o le va o le Aso Lulu, 4 o Me ma le Aso Tofi, 5 o Me i le vaiaso ua tuana’i. 

O le isi maliu o si tina 94 tausaga le matua o le soifua ma sa uma lona ola i se taimi o le va o le Aso Tofi, 5 o Me ma le Aso Faraile, 6 o Me. O i laua nei ua ma’umau le soifua e leai ni gasegase tumau, peitai e lei faia ni tuipuipui o le Koviti. O ripoti mai le aso 4 o Me i le 2 i le aoauli seia oo mai i le aso 6 o Me i le itula e 2 i le aoauli, o loo faailoa mai ai e tusa ma le 267 i latou na maua i le vairusi o le Koviti i totonu o le piliota lea. 

E to’aono sa faanofoesea i le falema’i i totonu o le 24 itula ua tuana’i ai. E tusa nei ma le 10,926 tagata ua maua i le Koviti i le atunuu. O lea numera e 76 i latou na malaga mai fafo na suesueina ua maua i le faama’i, ae o le 10,850 o i latou lava na pesia ina ua pepesi i tua le vairusi o le Koviti i le atunuu lautele. 

Ua faamaonia mai e tusa ma le 222 i latou na taofia i le falema’i talu ona pepesi le faama’i e amata mai le aso 17 o Mati, 2022. E 191 ē ua te’a i tua ua malolo ma manuia. Talu lava ona aafia Samoa i le faama’i ina ua pepesi i tua, e 22 i latou ua ma’umau le soifua. O faaaliga mai le Matagaluega o Soifua Maloloina ua faailoa ai e silia i le 80,000 suesuega (RAT Test) sa faatinoina i totonu o Samoa. 

Scroll to Top

Keep uptodate with Radio Samoa activity & promotion

* indicates required