E toalua ni tamaitai o loo umia le tomai o le suetusi poo auditors i le ofisa suetusi sili a lo tatou Malo, ua faamanuiaina i ni avanoa sikolasipi e faalautele ai o la tomai i le iunivesite o mataupu tau suetusi i le atunuu o Saina e ta’ua o le Nanjing Audit University.
O le tamaitai o Paula Tumua ma Angel Kwan o loo umia ni tulaga sinia i le Ofisa o le Pule ma Suetusi Sili a le Malo o Samoa, ma o le filifilia o i laua mo ia avanoa sikolasipi o le a sueina ai o la faailoga o le Masters i tomai tau suetusi i le Iunivesite o Nanjing i Saina.
Faaalia e le Ofisa o le Suetusi Sili a le Malo i se faalauiloa i lana upega tafailagi, o le lona fitu ma le lona valu lea o avanoa faapea ua maua e nisi o lana aufaigaluega e faalautele ai o latou tomai mo le faia o galuega suetusi mo auaunaga eseese a le Malo.
O le manuia o ia aoaoga ma maua ni faailoga maualuluga o se fesoasoani tāua tele lea o le a faaaogā ai tomai e tautuaina lo tatou Malo.
Mo le silafia o le Ofisa o le Pule ma Suetusi Sili a le Malo o loo gafa ma le sueina o tusi i le faaaogāina o tupe o loo faamatuu atu i matagaluega ma faalapotopotoga a le Malo.
