E to’alua matai o loo umia le suafa Vui o le afio’aga o Lano i Savaii o le a tauva i le palota tele o sosoo ai nei, mo le nofoa o le itumalo o Faasaleleaga 5.

O le afioga Vui Seigafolava Masinamua ma le afioga Vui I’iga Sione I’iga na momoli atu i le vaega faaupufai o le Faatuatua i le Atua Samoa ua Tasi i le Aso Tofi o le vaiaso nei.

O le itumalo o Faasaleleaga 5 o loo aofia ai afio’aga o Amoa i Sisifo, Lano, Asaga ma Pu’apu’a ma o le afioga Peseta Vaifou Tevagaena o loo tula’i mai i le taimi nei i le tofi o le itumalo ma o se sui lagolago o le vaega faaupufai e puipuia aiātatau a tagata.

O le palota tele o le tausaga e 2011 na filifilia ai Peseta i le tofi Faipule e oo mai i le taimi nei.

O ia o se tasi sa galue o se malu o le malo poo se leoleo, ae o tamalii e to’alua ua sii o la aao e tauva mo le nofoa o Faasaleleaga 5 i le fu’a a le Faatuatua i le Atua Samoa ua Tasi, sa auauna foi ma tautua o ni Malu o le Malo i tausaga ua mavae.