Ua faailoa e le faiaogaulu a le ‘au taitoafitu a Samoa, Muliagatele Brian Lima lona aami atu o sui taaalo e toalua mai le atunuu e faaopoopo i le ‘au a le atunuu o loo iai nei i Dubai, a’o loma ai isi vae o le taamilosaga taitoafitu a le lalolagi i Toulouse i Falani ma Lonetona i le masina nei.
I ripoti a le Samoa Global News na faailoa ai o le alii ia Malo Alani Luteru ma Ati Junior Ati ua malaga atu i Dubai i le nofoaga o loo faumautu ai le ‘au a le atunuu. O nei alii e to’alua e ta’i 20 tausaga le matutua ma sa fai foi ma sui o le ‘au a Samoa i lalo o le 18 tausaga poo le Under 18. Ua filifilia i laua nei ona o le mataina o la taumafaiga i le tele o taamilosaga e faia i Samoa.
Na faaali le agaga o le fiafia ma le faagaeetia o nei taulele’a e toalua mo le avanoa ua filifilia ai i laua e taaalo i le ‘au a le atunuu i nei taaloga faavaomalo. Ua matauina foi le agai i luma o taumafaiga a le ‘au talu ona toe foi i le taamilosaga taitoafitu a le lalolagi ona o nisi o sui o le ‘au o loo aafia i le Koviti.
O le aso 20 – 22 o Me o le a faatautaia ai loa le vae i Toulouse i Falani lea ua faatulaga mai ai Samoa i le Pulu D (Pool D) faatasi ai ma Aferika i Saute, Aialani, ma Sepania.
