Toalua sui o le a tauva i lalo o le fu’a a le HRPP mo le faigapalota laititi e sailli ai se sui faipule o Gagaifomauga Numera 2.

I se feiloaiga a le autusitala i le taeao nei ma le sui ta’ita’i o le HRPP, Fonotoe Luafesili Pierre Lauofo ma le latou failautusi, Lealailepule Rimoni Aiafi, na ta’ua ai e Lauofo le masii ane o le itumalo o Gagaifomauga Numera 2 e momoli ane a latou sui e toalua e tauva mo le nofoa o le itumalo, o le fetalaiga Sooalo Poka ma le fetalaiga Sooalo Mene.

Saunoa Lauofo, o Sooalo Poka, o se tasi ua leva o galue o se faiaoga, ma o se matai ua tele tausaga o tausinuu i le itumalo ma tele foi tausaga o fai monotaga, o se tasi foi o faiupu a le afioaga o Samauga.

Mo le fetalaiga a Sooalo Mene, o ia lea sa tulai mai le tofi o le itumalo i le paeaiga talu ai ae na malolo i le afioga Va’ele lea na amata maia le tofi o le itumalo i lenei paeaiga, seia oo ina tuumalo faafuase’i i le masina o Mati o le tausaga lenei 2022. O le fetalaiga a Sooalo Mene, na tofia foi e avea ma se tasi o minisita lagolago i paeaiga na iai, ma le tele o isi tiute faapalemene sa galue ai.