Ua faailoa nei e le vaega faaupufai a le Faatuatua i le Atua Samoa ua Tasi ona sui tauva e to’a lua o le a tamomoe i le faigapalota laititi i le masina fou mo le itumalo faapalota o Falealili No.2.
O nei sui faatutū e aofia ai Fuimaono Taaala Laauli Talataina o se tasi na avea ma malu o le malo i tausaga ua tuanai ma le isi sui o se alii faipisinisi le susuga Maiava Fuimaono Tito. O sui nei e toalua a le FAST o le a tauva faatasi ma le sui a le vaega faaupufai e Puipuia Aiā Tatau o Tagata le HRPP le susuga Leleimalefaga Neemia.
O le masina o Aukuso na tuuina aloaia atu ai Leleimalefaga i sui o le itumalo i le HRPP peitai o le faaiuga o le vaiaso lea faatoa faailoa ai sui e toalua a le FAST. O le toe foi ai o Falealili No.2 e fai le palota laititi ona o le faaiuga a le faamasinoga lea na tau fai faamaonia ai tuuaiga o faatosina o le palota a le sui na manumalo Fuimaono Samuelu Te’o a le HRPP faapea le sui na faaulu le tagi o le vaega a le FAST le susuga Veletaloola Fuimaono Avauli ma lē mafai ai ona toe tauva i le palota laititi.
O le masina fou i lona aso 26 lea o le a faataunuuina ai loa faigapalota laiti a itumalo e 7 o loo tālia ni a latou sui faipule.
