O le tala fiafia i le aumalaga a le aulakapi a le Laumua o Tumua ina ua malaga mai i le taitoafitu a le Malisi, ua mafai ai ona filifilia nisi o ana tamafanau i totonu o le ‘au filifilia a le Moana Pasifika e pei ona faiaoga ai le susuga ia Faalogo Tana Umaga.
O le susga ia Melani Matavao ma le susuga ia Junior Tuitama o laua ia na piki atu e le pulega a le Moana Pasifika mo le tapenaga a le ‘au auā le Super Rugby o le tausaga 2024.
E filifilia i laua nei a o lei malaga mai le autaitoafitu a le Laumua o Tumua auā le faataunuuina o le latou valaaulia mai le taitoafitu a Malisi se’i mavae atu nei.
O le filfilia ai o Melani Matavao ma Junior Tuitama o se fiafiaga sili lea i le susuga i le faiaoga ia Sulusi Kelupi Fata ma le pulega a le ‘au ona ua luitau ai nisi o alo ma tamafanau o loo taaalo i totonu o le ‘au a le Laumua o Tumua.
Saunoa le susuga i le faiaoga, ua telē le sao ma le luitau a nei alo i totonu o le ‘au, e lē gata i le faatinoina o le taaloga taitoafitu a Malisi lea ua latou manumalo ai i le ipu o le plate, ae ua siitia maualuga ai foi le tulaga faaeaea mo le ‘au atoa faapea le afioaga.
O le taimi nei ua auai atu nei i laua i totonu o le nofoaga ua iai le ‘au a le Moana Pasifika auā tapenaga o le ‘au mo le taamilosaga a le Super Rugby i le tausaga fou.
O le avanoa ua maua e sui nei e toalua a le Laumua o Tumua i ‘au tetele nei a Niu Sila ua silasila ai le faiaoga ma le pulega ia maua nisi kalapu i totonu lava o Niu Sila mo alo ma fanau o le Laumua o Tumua e atinae ma finafinau ai mo le faalauteleina o le taleni o le lakapi.
