O suesuega a leoleo i le polokaina o se vaega o le auala i le motu tele i Salafai ina ua masii le vaega faaupufai e Puipuia Aiā Tatau o Tagata le HRPP mo le latou solo a taavale e faalauiloa ai le latou tetee i le faamasinoga ma faaiuga i le mataupu o le palota ua lē gata ua molia ai nei taulele’a o le afioaga o Salelologa ae lea foi ua faailoa e leoleo ua molia ai ma ni matai se toalua o le afioaga o Sasina.
O moliaga o ia matai e toalua e pei ona faailoa ai e le Sui Komesina o Leoleo le afioga Auapaau Logoitino Filipo i le niusipepa a le Sunday Samoa o le faia lea o you faatupuina vevesi ma upu tau faamata’u. O loo faagasolo pea suesuega ma iai nisi moliaga faaopopo.
O le masina o Aukuso na alu ai le faalauiloa a le patī o le HRPP i Savaii ma le faamoemoe e taamilo i le motu peitai na faamuta lea faamoemoe ma toe foi ai i Upolu ona o le puipuiga o le saogalemu.
E mafua lea tulaga ona o ni gaioiga na tutupu ma aliali mai ao iai i Salafai le taitai susuga Tuilaepa Lupesoliai Sailele Malielegaoi ma sui o lana vaega faaupufai faapea le au lagolago.
O le masina nei o Oketopa o le a valaau ai moliaga o matai ua molia i le faamasinoga faaitumalo.
