Ua faamaonia mai e le alii komesina o leoleo Auapaau Logoitino Filipo le maliu ai o se tamā 54 tausaga le matua o Vaitele ina ua lavea i le taavale a se alii 40 tausaga le matua o Siusega.
Ua faailoa e le Komesina ua molia ai nei e leoleo lea alii 40 tausaga i le moliaga o le avetaavale faatamala ua mafua ai le maliu.
E lei iloa i le taimi nei le aso e tulai ai lea alii i le Faamasinoga e tali i ona moliaga.
Ae o loo faagasolo suesuega a leoleo i le taimi nei i Gagaifomauga i Savaii i le maliu o se alii 26 tausaga le matua o loo masalomia na uma lona ola i se laaumalosi, o loo masalomia na ia faaoo lava ni manu’aga ia te ia ma uma ai lona ola.
Sa faailoa mai e le alii komesina e ui i lea tulaga ae o loo agai pea suesuega a leoleo e masalomia o se isi na ia faaoo le oti i lea alii (homicide).
O loo taoto nei le tino maliu o lea alii i le falemaliu i Tuasivi a o faaauau ai suesuega a leoleo i lea mataupu.
