O le maliu muamua na tulai mai i le Aso Lulu, o se tamā 43 tausaga le matua o le soifua mai Lotoso’a Saleimoa ina ua aafia i se faalavelave tau taavae.

Na maliu lava lē na aafia i le nofoaga na tulai mai ai le faalavelave.

Faamaonia e Papalii Monalisa Tia’i Keti o le taavale o le ituaiga o le Hiace Van lanu pa’epa’e, ma ua lipotia e 58 tausaga le matua o lē sa faafoeina le taavale, ma ua saoasaoa tele le taavale, toe faasuaavā le avetaavale.

E lei tu le taavale ina ua tulai mai le faalavelave, ma sa tuliloa mai e se taavale la’upasese a le afioaga lava ma maua ai i Malie ma taofia ai.

O le moliaga o le avetaavale faatamala ua afua ai le maliu o se tagata lea ua molia ai lea alii mai le afioaga o Laulili.

O loo tatala i tua e faatali ai le aso 15 o Aperila e tulai ai i luma o le faamasinoga.

O le maliu lona lua o se alii 29 tausaga le matua mai le afioaga o Faleatiu.

Faailoa mai e Papalii e 22 tausaga o lē ua molia i le fasioti tagata faamoemoeina.

O se faalavelave matuiā na faaaogā ai se laaumalosi.

O loo nofo taofia e faatali ai le aso 15 o Aperila foi e tulai ai i luma o le faamasinoga.