E toaiva tagata ua pueina e leoleo mai Hawkes Bay ma Aukilani ona o le aofia i se mataupu ua ta’ua e faitau miliona tupe e maua ai i le mataupu e aofia ai fualaau faasāina.
O suesuega a leoleo sa faia i faaitu ia e lua na maua ai fualaau faasāina ia ma fana.
E ese mai ia suesuega na taofia foi e leoleo se taavale i le State Highway 5 na maua iai le tusa ma le 10kilo o mariuana.
A tuufaatasi tusa e 30 kilo o le laau faasāina, fualaau o le MDMA ma le cocaine ma le tupe e 200 afe na maua uma e leoleo.
Na maua ai foi e leoleo ma fana e tolu atoa ai ma le iloa ai o fale e fā, valu taavale ma isi aseta taugata e aofia ai auro na maua uma i nei osofaiga.
O le toaiva la lea ua pueina ua feagai nei ma moliaga eseese e aofia ai le umia o fualaau faasāina ma lona sapalaia faapea foi le umia o auupega faasolitulafono.
E toa 6 na pue e leoleo mai Hawkes Bay ma le toa 3 mai Aukilani e amata mai le 22 tausaga e oo atu i le 67 tausaga ma ua faatulaga e tutulai i le faamasinoga i le aso 16 o Aokuso.
