O le aso 28 o le masina lenei o Ianuari e oo i le aso 4 o Fepuari, e amata ai le polokalame o le tauvaga lea e sailia ai se Tausala o Motu o le Pasefika poo le Miss Pacific Islands 2024, lea o le a faia i le atunuu o Nauru.
E toafitu tamaitai lalelei mai atunuu o le Pasefika ua saofagā atu e tauvaina lenei tofiga tāua, e avea ai ma se tamaitai na te tauaveina le pale poo le tofi mo le Tausala o Atumotu o le Pasefika, ma galue ai e faalauiloa le Pasefika i le lalolagi aoao.
O atunuu o le a tauva o latou sui, e aofia ai: Samoa, Tonga, Papua Niu Kini, Marshall Islands, Nauru, Amerika Samoa ma Palau.
O ata o tamaitai ua maua mai e toaono, ae tusa ai ma se lipoti mai le itulau i le api o foliga a le Pacifica Pageant Community, o loo tapena mai foi le tamaitai tauva a le atunuu o Palau, o Dee-Raya Antonio, e toafitu iai tamaitai tauva.
O le tausaga lenei e atoa iai le 34 o tauvaga faapea i totonu o le Pasefika talu mai ona amataina i le tausaga e 1987.
O le taimi nei o loo tauaveina e le Tausala o Papua New Guinea le pale o le Miss Pacific Islands 2023, le tamaitai o Josie Nicholas.
O le a tapuaia e atunuu taitasi o latou sui tauva, e pei foi ona taulai uma atu le tapuaiga a Samoa i lo latou Tausala, le tamaitai lalelei ia Moemoana Safaato’a Schwenke.
O ou māmā na Moemoana!!! Alo ia i ou faiva a o taputapuai atu lou atunuu!!
Samoa 
Moemoana Schwenke
Tonga 
Sitita Va’enuku
Papua New Guinea 
Tyla Singirok
Marshall Islands 
Claret ChongGum
Nauru 
Rosita Rokobuli
American Samoa 
Judy Taunuu
Palau 
Dee-Raya Antonio
