E toafā talavou ua faia iai moliaga i le mae’a o se suesuega tele a leoleo i Melepone e aofia ai se vaega tele o malu o le malo.

O talavou ia e aofia ai se tamaitiiti e 16 tausaga, toalua teineiti e tai 15 tausaga ma le isi tamaitiiti e 14 tausaga le matua ua feta’ua’ina na o latou osafia ni fale se lua ma taumafai e ave faamalosi se taavale a o faaaupegaina i ni agaese ma fai mai e oo atu i le 200km i le itula le saosaoa na alu ai le taavale na malaga atu ai.

O le lipoti a le 9News ua ta’ua ai e oo atu i le 20 taavale a leoleo ma le vaalele helicopter na aofia ai i le tuliga o le taavale lea o le Nissan Pathfinder a o saosaoa solo i magaala i Geelong.

O nisi na molimauina tuliga ia i le aso ananafi na o latou faamaonia le saosaoa tele o le taavale na agai atu ai talavou ma pue ai loa e leoleo i fafo ane o se tasi o taulaga faatau i Melepone lava.

O le a tulai isi o i latou ia i le faamasinoga o tamaiti ae faafetai i leoleo ona e leai se soifua na aafia i lenei faalavelave.