E toa sefulu foma’i ua faamaonia e le Kapeneta o latou tofiga i matata faapitoa ma avanoa sinia poo direct appointments ma ua faauluulu iai nisi o auaunaga faalesoifua maloloina e pei o le vaega o faalavelave faafuasei le Emergency, le falemai o fanau poo tamaiti, le vaega e taunuu iai gasegase le outpatient, le vaega o gasegase tigaina le ICU, ma le vaega o gasegase o le faa’ī ma isu.
O fomai ia e pei ona faailoa i le faaiuga a le Kapeneta, e agavaa i le faamanuiaga o le alauni ua ta’ua o le responsibility allowance, ma o latou totogi i le tausaga o loo faavasega mai i le 107 afe ma ona tupu i le tausaga, 117 afe, 124 afe ma le 127 afe i le tausaga o le a maua le 60 pasene o lea alauni e fua i le aofai o le totogi o loo maua i le tausaga.
O loo faatulaga mai le aofaiga o lea alauni e maua i le 64,497.60 sene i le fomai o loo konekarate ma maua le totogi e 107,496 tala i le tausaga.
E 70,477.80 sene mo le fomai o loo maua le totogi e 117,463 tala i le tausaga.
E 74,770.20 sene mo le fomai o loo faatulaga lona totogi i le 124,617 tala i le tausaga, ma le 76,265.40 sene mo le foma’i o loo maua le totogi e 127,109 tala i le tausaga.
O le masina nei e amata totogi atu ai ovataimi o tagata faigaluega tumau o le soifua maloloina, e aofia ai fomai ma tausi soifua lea e silia i le 7 miliona 3 selau afe tala e faaalu ai, ma le alauni ua ta’ua o le responsibility allowance mo fomai o loo galulue faakonekarate e lē agavaa i se totogi o ni itula faasili poo ni ovataimi.
