E to’a 14 ni tagata ua lipotia mai le maliliu ma le isi to’atolu o loo i ni manu’aga tugā i le taulaga o Sweto i Johannesburg i Aferika i Saute ina ua osofa’ia se falepia e ni tagata ma tafana ai i latou sa iai i lea nofoaga, i le po o le Aso Toonai, e tusa ai o se lipoti mai leoleo. 

O loo lipotia i le NZHerald i tala mai atunuu mamao le tulai mai ai o lenei faalavelave mata’utia, ma o loo faia pea suesuega a leoleo i le mafuaaga o lenei faalavelave. 

Ta’ua i lipoti a leoleo, o se kulupu o ni alii na o atu i se minibus taxi, ma amata loa ona tafana solo tagata sa i totonu o le pa i le leva o le afiafi. O le taeao o le Aso Sa ananafi na vaaia ai ua amata ona aveese atu e leoleo tino o i latou na maliliu. 

O le tulai mai o lenei faalavelave mata’utia i le pa pia i Sweto ae faato’ā lua ai vaiaso talu ai na maua ai foi tino maliliu o ni tupulaga talavou se to’a 21 i se pa pia i le aai i East London i Aferika i Saute.

E oo mai le taimi nei e le’i faailoa mai lava pe na faapefea ona maliliu na talavou, pau le mea ua mautinoa mai leoleo, e lei tafanaina pe solia i se tumutumu o tagata e pei ona mua’i masalomia ai.