Ta’ua e tagata Mangawhai e mamafa atu timuga o le po o le Aso Faraile na i lo le afā o Gabrielle.
O se faaiuga o le vaiaso pisi i galuega faamamā ona o mea na faaleagaina e lologa mo aiga nei.
I faamaumauga mai le council e faapea, e 250mm le timu pa’ū na faamauina i totonu o le na o le tolu itula, ma o lea na iai taavale na lofia ai, ma sa le mafai ona faaauau faigamalaga a nisi, tele le palapala solo faapea ai ma nisi o fale na lolovaia ma aveese faamalosi mai tagata.
A o lei toe pa’ū timuga mamafa i le po o le Aso Faraile faatoa uma atu, ae o lea ua tusa ma le $120 miliona le tupe moomia e faaleleia ai auala na faaleagaina e Gabrielle i le itu i Matu ma o se tupe foi ua valaau mai ai le pulenuu o Whangarei i le malo e fesoasoani atu.
E tusa ma le 55 i latou na le mafai ona nonofo i o latou fale ona o le lē saogalemu ma o lea na momoe ai i le Campbell Park Christian Camp i le po o le Aso Faraile faatoa taape i le aoauli o le Aso Toonai.
E ese mai i aiga na aafia, o se faaiuga o le vaiaso pisi mo le au galulue a o taumafai ai e toe faaleleia auala tapunipuni e mafua mai i le tele o le palapala solo ma e oo mai i le taeao nei, o loo iai lava nisi o auala o loo tapunia pea.
