O lea ua savali le lua vaiaso o taofia pea i le falemai i Aukilani i se tulaga tigaina le teineititi 5 tausaga lea na so’a ma toe oso ai i luga le taavale.
O Little Sapphire Wakefield na so’a e le taavale a o savavali ma ona uso e toalua i le tuua o le aoga i le Aso Tofi o le vaiaso talu ai, ma e lē mamao ma le aoga tulagalua a Finlayson Park School e aooga ai le mea na tupu ai.
O loo lipotia e le Herald e tigaina manu’aga i lona ulu faapea ai lona tuasivi ma pe ā ma le lua mita lea na toso ai e le taavale lona tino a o lei toe solomuli ma oso ai i luga.
O loo iai le talitonuga o leoleo o le avetaavale na foeina le taavale o lea sa fai lana telefoni i le taimi o le faalavelave.
O le asō le aso fanau o le tamaitai ia Sapphire, e atoa ai lona ono tausaga ma a o tigaina ai i le falemai o lea na tapenaina e ana uo mai le Finlayson Park School cards faapea meaalofa.
