O le a faamalosia tulafono o loo puipuia ai talavou o loo tuli faasalaga atoa ma le faia o isi fale fou e lua.
O ni suiga faaopoopo i le lisi a le Palemia, Chris Hipkins i lenei vaiaso a o taulai ai i soligatulafono o loo taulamua ai tupulaga talavou.
I fale fou e lua ua faailoa mai e le Palemia, e leai se taimi o ta’ua mai ai poo afea e tatau ona fausia ma faamae’a ai pau o lea o loo mananao e vave fau ma o Aukilani ma Kalaiesetete lea o loo tilotilo iai.
O fale fou foi nei o le a nonofo ai le ta’i 17 ma 18 tausaga le matutua ma afai foi ae alu alu nonofo ai ma talavou laiti, o le a iai lava le faiga e tuueseese ai.
Ae i suiga o taiala mo le puipuia o talavou o loo i totonu o nofoaga nei, o lea o le a faaopoopo i le faiga o loo tuueseese ai nei talavou i taimi e talitonu ai le aufaigaluega e ono iai se tulaga lamatia ona o fevesiaiga e pei ona molimauina i talavou na toe o i luga o taualuga ma faaleaga fale.
E le gata i lea ae o le a faaopoopo tagata faigaluega latou te faatalanoaina fanau talavou e tuuitiitia ai le toe foi lava e soli le tulafono i taimi e omai ai i tua atoa ai.
O lea foi o le a teuteu le tulafono e mafai ai e le aufaigaluega ona suesue soo se tasi e ulufale i nofoaga o loo faasala ai talavou ina ia mautinoa e lē o sao atu i totonu nisi lava auupega, telefoni faapea ai ma tapaa.
