Na faia solo tetee a tagata Waiheke ananafi e faaleo ai lo latou lē fiafia i le 19% siitaga o le tau o loo totogi e nisi o pasese feoai.
O le lē fiafia o tagata Waiheke o loo faasagasaga lea i le kamupani umia saoloto a le Fullers lea e anaina ava feoai i le sami o loo feoa’i ai tagata Waiheke i le omai i Aukilani faapea ai ma le toe foi.
Fai mai nisi o tagata sa iai i lea tetee, o le siitaga ua iai ua o se avega mamafa ua faafaigata ai filifiliga a nisi pe omai e vaai le fomai, pe leai.
O le taugata o pasese ua o se faanoanoaga tele i pisinisi o loo i Waiheke, ona o lea ua maitauina le faaitiitia o tagata e o atu mai Aukilani agai i Waiheke mo tafaoga.
O le manaoga o le toatele ia aumai vaa o loo feoai ai tagata Waiheke i lalo o pulega o loo pulea ai femalagaa’iga lautele a le atunuu.
