E lē o maluelue ae o loo mausali pea finagalo tetee o faamasino o le Faamasinoga Maualuga (Supreme Court) ma faamasino o le Faamasinoga Faaitumalo (District Court) i suiga tetele ua faatino i le pulea ma le faagaioia o galuega a le faamasinoga o fanua ma suafa a le atunuu, ina ua pasia e le Palemene i le tausaga e 2020 teuteuga fou ua faaofi i le tulafono faavae, ma le tulafono o faamasinoga o fanua ma suafa o le tausaga 2020.

O loo faailoa le tumau pea o lea tetee i le tali tusitusia a faamasino o le faamasinoga maualuga ma le faamasinoga faaitumalo, ua mae’a ona tuuina atu e tali ai le tusi a le Ofisa Sili o Pulega o le Matagaluega o Faamasinoga ma le Faafoeina o Mataupu tau Faamasinoga sa toe tapa ai ni finagalo o faamasino i teuteuga ua fuafua e toe suia ai teuteuga o le faavae ua mae’a pasia faaletulafono, faapea nisi o suiga i le tulafono fou o faamasinoga o fanua ma suafa.

O loo faaalia i lea tali tusitusia a faamasino o le tulaga sa iai e faatino lava galuega a le faamasinoga o fanua ma suafa, ae o le faamasinoga maualuga na te suesueina se aafiaga o ni aiātatau o tagata i se mataupu a lea faamasinoga ua fesiligia ai e ni itu auai.

Afai ae faamaonia ua aafia aiātatau o se tagata poo ni tagata, ona toe ave lea o sea mataupu e toe tagofia lava e le faamasinoga o fanua ma suafa.

O se tasi o suiga o loo tapena e toe faaofi, o le tasi o le faauluuluga o le faamasinoga o le Faamasino Sili.

O loo tapena ese le tali a le Faamasino Sili i teuteuga o loo tapena, e ese mai le tali ua tuuina atu a Faamasino uma o le Faamasinoga Maualuga e amata mai i le faamasino sinia, e oo i faamasino uma o le Faamasinoga Faaitumalo.

O loo sainia uma o latou suafa i le latou tali tusitusia ua tuuina atu i le Ofisa Sili o pulega o le matagaluega o faamasinoga le susuga Papalii John Taimalelagi Afele, ae kopi ai le Palemia, Minisita o le Matagaluega o Faamasinoga ma le Faafoeina o Mataupu tau Faamasinoga, o loo kopi foi i le Loia Sili a le Malo ma le afioga i le Faamasino Sili.

O tapenaga o loo faagasolo i ia suiga o le a faaofi i le tulafono faavae ma le tulafono o faamasinoga o fanua ma suafa, o loo fuafua e tatau ona folasia i le laulau a fono a le Palemene i le masina o Aukuso.