E tetee mātua i Sisifo o Aukilani i le tatala o le faleoloa fou e faatau ai vape e latalata i le aoga.

Fai mai mātua o fanau o loo aooga i le aoga a Parakai e lē fetaui le faatū o lea faleoloa fou e latalata i le aoga ona o le popolega i soifua maloloina o fanau.

O le faleoloa fou e tusa lea ma le 450 mita mai le aoga, ae latalata i le gate pito i tua a le aoga poo le auala foi lea e tele ina faaaogā e fanau aoga.

O se mau o loo lagolagoina e le minisita o le soifua maloloina Dr Ayesha Verrall, ma ua fai mai ai le minisita e sa’o le lē fiafia o mātua.

O se tasi lenei o mataupu na fai mai ai le malo i le masina o Iuni o le a agai iai e faasā le faia o faleoloa fou lea e faatau ai vape i totonu o le 300 mita mai le aoga poo le marae, ae mai le sui o le soifua maloloina, o suiga nei o le tulafono o le a faailoa mai i le masina nei pe a maua le faaiuga a le Kapeneta.