O moliaga a le sui Faipule o Vaimauga 3 i le ave e le sui Faipule o Faleata 3 o le tai selau tala i ni tagata palota se toalua o le itumalo a o lumanai le faiga filifiliga na toe sailia ai se tofi o lea itumalo i le Palemene, ua teena malosi e le tofa Lealailepule Rimoni Aiafi ina ua faatino lana molimau i auala o fesootaiga le video link.
E ioe le molimau sa iai tagata palota ia e toalua o Laloata ma Masaga i le fale o le sui tauva ua faauluina le tagi tau palota le susuga Samau Leatigagaeono Solitamalii Timani, i le aso na alu atu ai Lealailepule i le fale o Samau, peitai o le tuuaiga e faapea sa ia alu i totonu o le fale i le faletua o Samau ma avane ai se tai selau tala, e sese ma lē sa’o lea faamatalaga.
Na lagolago lea tetee e Samau i lana foi molimau, na ia ta’ua ai e sese ma lē sa’o le faamatalaga a le molimau a Masaga e faapea sa geno atu ia Lealailepule e alu i totonu o le fale i lona faletua e avane se tupe mo ia tagata palota.
Ua mae’a ai nei ona suesueina molimau o le tagi tau palota ma ua faatulaga o le 2 i le aoauli o le Aso Faraile le faaiuga o lenei vaiaso, e faia ai folasaga faaiu a loia ona iloa ai lea o se aso e fofogaina ai le faaiuga.
