O moliaga e ono e aofia ai le lua o moliaga o le faaoo o le maliu i se isi tagata soifua, moliaga o le faaaogā o se laau malosi, umia o se aupega mata’utia, ma le taumafai e faaoo le oti i se tamaitai, ua teena uma e le tamā o Aui’a Fereti Moefiti 54 tausaga le matua.

Na toe tulai o ia i le faamasinoga sili i le Aso Gafua o lenei vaiaso ma tuuina atu ai e lana loia lana tali tetee. Ua faaauau ai pea ona nofo taofia i le vaaiga a leoleo ae ua faatulaga le Aso Tofi asau e su’esu’e ai lana talosaga e tatatala i tua i ni aiaiga.

O Aui’a o loo tuua’ia i le faalavelave i le masina o Iuni na tulai mai i Fogapoa i Savaii, na maliliu ai se tama ma sona atalii i ni manu’aga tuga mai se laau malosi. O Mati o le tausaga fou ua faatulaga e le faamasinoga e valaau ai molimau a leoleo e lagolago ai moliaga o Aui’a.  

I le faamasinoga sili lava a le atunuu i Mulinuu, ua talia nei se faaiuga i le talosaga a le itu a leoleo ua toe lu’i ai e ala i se apili, le faai’uga a le faamasinoga faaitumalo na talia ai le talosaga a Khamtan Stanley o se alii leoleo satini ma Ulugia Lomalasi Laufili, na o la ioeina moliaga o le faaoolima, ma le faaoomanu’a na mafua ai ona maliu se alii talavou o le afioaga o Vaiusu i le tausaga e 2019.

O le toe apiliina e leoleo o le faaiuga na faasalatupe ai i laua ia, ae talia le la talosaga o le faapafala o se faai’uga e aunoa ma le faamaonia o moliaga, o loo faavae i ni mau e aofia ai le ‘ela o le silasila a le faamasinoga i le tulafono i lana faai’uga. O loo finau leoleo sa tatau ona faamaonia moliaga ma faia se faasalaga. O le afioga i le faamasino sinia o le faamasinoga sili, susuga Lesatele Rapi Vaai o loo tauaveina lenei finauga ma ua tālia se aso e aumai ai lana faaiuga. O le taimi nei ua toe galue Khamtan Stanley i le matagaluega o leoleo, a o faatali se faai’uga o le talosaga apili a leoleo.