I le tuanai ai o nai aso talu ona afatia Tonga i le mauga mu faapea le Tsunami na faaleagaina ai le tele o meatotino ma maliliu ai tagata ua vaai le taimi nei galuega o loo faatino i le toe tau fonofono ma tapenapena tagata o le atunuu mo le faamamaina o auala ma vaega umana faaleagaina.
O nei ata o molimau ia o le malosi ma le matautia o le faalavelave faalenatura na aafia ai le atunuu, ua vaai tagata ua agai atu e fesoasoani mo le faamamaina o vaega eseese, e le gata o laau pa’uū, o fale ua faaleagaina ae faapea foi le to’a o le efuefu poo le ash lea na afua mai le mauga mu.
E lē mafai foi ona tu laueleele le vaalele a le NZ Defence Force Unit le ao loo auina atu ai nisi o sapalai e fesoasoani mo Tonga pea a lē kilia se vaega e tu ai lenei vaa tele. O le telē lea o le aafia o le atunuu ua iai nei. O nisi o nei ata na faailoa e aiga o i latou o loo i Tonga o loo aumau i atunuu mamao faailoa ai lo latou valevale alofa i nai o latou tagata.
O loo faaauau pea galuega alofa ma isi atunuu o le lalolagi ma o le a fesoasoani foi i le kiliaina o vaega eseese o loo poloka ai auala ae faapea foi le faaamamaina atoa o nofoaga taitasi na aafia.
