Ua tauau lava ina faaauau pea le taatele o faalavelave ua lipotia o afi e sasao ane i fale ma isi nofoaga e mafua mai i maa, lithium ion batteries e pei ona faailoa e le vaega a le tineimu.

E lua foi isi afi na sasao ane i Sini i le taeao analeila ae iai foi sootaga i ia ituaiga maa.

O le isi faalavelave na mu ai se uila, se Bike i se poloka o fale i Bankstown i le ‘afa o le ono i le taeao analeila, e foliga mai o le maa sa fafaga o le uilaafi lea na mafua ai le faaletonu e faaigoa o le thermal runaway lea e ova vevela ai le ituaiga maa lea lithium ion ma amata ai ona alu ifo ai se kasa a o lei pa ma mafua ai se afi e sasao ane ma e faigata foi ona tapē.

O le isi faalavelave o se scooter na mu i le pito i tua o le loli lapisi i Silverwater ma faavave atu foi iai le fuimu.

Ua faamanatu mai e le Fuimu e lē tatau ona lafoai ni maa batteries i totonu o lapisi ona e lamatia ai foi soifua o tagata faigaluega i ia auaunaga.

E manatu le fuimu ua tatau ona fai se faatatau i ituaiga maa ia ona ua fai si tele o afi e sasao ane e mafua mai i ia ituaiga.