O loo teena pea e leoleo le tatala ai i tua o Samuelu Leautuli poo Sam Simiko e pei ona faaalia i le faamasinoga i le asō.

Na faailoa e le tamaitai Loia o loo tulai mo le itu a leoleo i le mataupu a le alii o Sam e faapea, o lea ua mae’a tuuina atu pepa o isi faamatalaga faatauto e lagolago ai la latou faasilasilaga ua tuuina atu i le loia o loo tulai mo Sam e teena ai le tatala o lea alii i tua.

Sa faailoa foi e le tamaitai Loia ia Leinafo Taimalelagi Strickland na faatino lava le galuega a leoleo o le tuuina atu lea o Sam i le falemai mo lona fā’ata CT Scan e pei ona poloaiina peitai na faailoa ane e le Falemai i Motootua e leai se avanoa na faatulagaina (appointment) a Sam mo se fā’ata.

Na talosagaina e le alii loia a Sam le toe tuu atu o le mataupu i le aoauli nei pe o se isi foi avanoa pe a mafai e tusa ai ma le faamasinoga tolopo atu mo se aso o lenei vaiaso, ae se’i tuu mai se avanoa se’i talanoa ai i isi o loo molia faatasi ma Sam e tusa ai o pepa ma faamatalaga nei ua tuuina atu e le itu a leoleo.

Aemaise ai foi o se avanoa mo le fā’ata o loo fia faia ona e iai lona tāua tele ma talafeagai mo mafuaaga o la latou talosaga ua faaulu atu e tatala ai i tua Sam.

Ua toe faatulaga ai nei e le Faamasinoga Faaitumalo le iloiloina o mafuaaga e tatala ai Sam i tua i le 12:30 i le aoauli o le Aso Tofi o le vaiaso nei.

O loo nonofo taofia pea Sam ma lona toalua o Sivai i le vaaiga a leoleo.