Ua lē talia e le Palemene le tulafono taufaaofi o le tala faatatau o tupe sa fuafua le Malo e tuuina atu ai lana fuafuaga o le tala autū o le tupe mo le tausaga faaletupe 2025 i le 2026.

O le lē mautinoa pe to’atele na leai pe to’atele na ioe i le lafo faatū a le Minisita o Tupe, na talia ai e le Fofoga Fetalai le lafo a le sui ta’ita’i o le Itu Agai mo le faia o se palota tauvalaau.

O le taunuuga e 34 na palota e teena le tala o le tupe a le faigamalo, ae na o le to’asefuluono na palota ioe, e aofia ai le Palemia ma Minisita o le Kapeneta ma le sui Faipule o Sagaga 2 le tofa Maulolo Tavita Amosa.

O loo tālia nei le fautuaga a le Palemia o le a tuuina atu i le Ao o le Malo po se poloa’iga e faasilasila aloa’ia ai le faata’ape loa o le paea’iga lona 17 a le Palemene, ae toe foi le atunuu e faatino lana palota tele e toe sa’ili ai ni sui usufono o le Palemene mo itumalo palota e 51.

O le amataga o le tausaga nei na faailoa ai e le tamaitai Palemia, afioga Fiame Naomi Mataafa i le Palemene, e faato’ā faata’ape le Palemene pe a lē faatuatuaina le faimalo i se palota o le lē faatuatuaina poo sana fuafuaga o le tala autū o le tupe.

E lua palota o le lē faatuatuaina sa manumālō le faatuatuaina o le Palemia ma lana Kapeneta, ae o lea ua lē faatuatuaina ina ua teena lana tala faatatau autū o le tupe, ma o le fuafuaga mulimuli foi lea tau tupe a le paeaiga lona  17 a le Palemene ona mae’a lea o le 5 tausaga o le nofoaiga.

E le’i palota le sui Faipule o Anoamaa muamua le afioga Alai’asa Sepulona Moananu ina ua sa’ili le lagolagoina ma le teena o le tala o le tupe.