Search

Te’ena e le Fa’amasinoga Mau a le HRPP Fa’asaga I Talosaga (Counter Petition) a le FAST

Ua te’ena e le Fa’amasinoga Maualuga talosaga e 12 a le vaega fa’aupufai o lo’o Puipuia Aia Tatau a Tagata (HRPP) fa’asaga i talosaga na folasia mai e le vaega fa’aupufai a le Fa’atuatua i le Atua Samoa ua Tasi (FAST) ma ua avanoa ai le tu’uina mai o talosaga tali (counter petition) fa’asaga i talosaga a le HRPP.

O isi talosaga e lua na tu’uina mai e le ta’ita’i o le vaega fa’aupufai a le Tautua Samoa, le afioga ia Afualo Luagalau Dr. Wood Salele ma Tupa’i Avala Savaiinaea.I taualumaga a le Fa’amasinoga, na maitauina ai le tete’e o loia sa tula’i mo le HRPP ma Afualo e tu’u le avanoa e faila ai talosaga tali (counter petition) a sui faipule o le FAST, mā sa fa’apena ona auiliili e ali’i loia ia Shane Wulf ma Leiataualesa Jerry Brunt vaega e fa’avae ai la latou finauga.

Na taua e Shane pau le vaega e tatau ona fa’ataga ai le faia o talosaga tali a sui o le FAST pe a fa’apea lea o lo’o manao i le nofoa o lē na manumalo i le faiga palota.Ae talu ai ona o sui o le HRPP lea o lo’o talosaga i mataupu ua i luma o le Fa’amasinoga i auala piopio (bribery) e le tatau la ona tu’uina mai ni talosaga tali, ae mafai ona tali (respond)..

O mau a Shane na faavae lea i nisi o mataupu ua maea ona tagofia e le Fa’amasinoga o Faiga Palota i tausaga ua tuanai, e pei o le mataupu i le va o Faumina Liuga ma Lē Tagaloa Pita faapea Uluvaomalo Kini ma Lealailepule Rimoni Aiafi.

Na taua e Shane o mataupu ia na silasila toto’a iai le Fa’amasinoga i vaega o le tulafono e mafai ai ona fa’avae ai i luga le tu’uina mai o le talosaga (petition) ma se talosaga tali (counter petition) ini faiga fa’asolitulafono i taimi o le faiga palota.I le mataupu ia Faumuina Liuga ma Le Tagaloa Pita, sa maitauina ai le talosaga a lē na uluai failaina le talosaga, ina ia aveese lona suafa mai le talosaga ae sui iai Le Tagaloa.I le mau a Shane na mafai ona fa’atino lea talosaga peitai, na faalia e le afioga i le Faamasino ia Vui Clarence Nelson, o le mataupu i le va o Liuga ma Le Tagaloa, e le’i fa’avaeina i luga oni faiga fa’asolitulafono, i le taimi o le faiga palota, ae o le iloiloina o le agava’a o Liuga e avea ma sui tauva o le faiga palota.

Na fesiligia e le tamaita’i faamasino ia Niavā Mata Tuātagaloa pe iai se eseesega o le tali (respond) ma le talosaga tali (counter petition).I le mau a Shane ma sa lagolagoina e isi loia, pau le taimi e mafai ona tu’uina mai ai se talosaga tali, pe a faapea lea ua lu’i e lē sa talosaga le nofoa o lē na manuamalo mai le palota.Peitai, na tulai le loia a le FAST le tamaitai ia Tanya Toailoa ma tali le fesili a le afioga ia Niava, e leai se eseesega o mea ia e lua.

E tutusa lava le tali atu (respond) ma le talosaga tali (counter petition) aua o lea o le a tali i mau po’o tu’uaiga o lo’o fa’apena ona fa’asaga mai ia te’i latou.

Na tu’uina atu e le afioga i le Ali’i Fa’amasino ia Vui le isi fesili taua fa’apea, “A fai e toalua na tauva i le nofoa e tasi, manumalo mai le toatasi a’o lea e silafia e le isi sui faiga piopio sa fa’atino e lē ua manumalo i le taimi o le faiga palota, e fa’apefea lā ona fa’ailo mai lea tulaga I luma o le Fa’amasinoga pe afai e le mafai ona tuuina mai sana talosaga tali?Na umi o ta’amilo le tali a le alii loia peitai, na toe tuliloa e Vui ma i’u ai ina fa’apea le ali’i loia, e lē faigofie ona tali lea fesili.

E le’i tu’uina mai mafuaaga o le te’ena ai o le talosaga a le vaega fa’aupufai o le HRPP, ae pau le itu na maitauina , na o le 15 minute na malolo ai le Fa’amasinoga ae toe taliu mai ma le fa’aiuga e te’ena ai le talosaga a loia a le HRPP.Ma ua tatala ai foi ma le avanoa e tu’uina mai ai talosaga tali(counter petition) mai sui faipule o le FAST.

O i latou o a’afia i lenei mataupu :

So’oalo Feo Mene (HRPP) vs Vaele Iona Sekuini (FAST)
Gatoloaifa’ana Amataga Gidlow (HRPP) vs Magele S. Fiuai (FAST)
Ili Setefano Ta’ateo Tafili (HRPP) vs Agaseata Valelio Peto (FAST)
Su’a Tanielu Su’a (HRPP vs Masinalupe Makesi Masinalupe (FAST)
Lopao’o Natanielu Mua (HRPP vs Niuava Eti Malolo (FAST)
Ifopo Matia Filisi Janhke (HRPP) vs Auapa’au M. Aloitafua (FAST)
Namulauulu Sami Leota (HRPP) vs Papalii Li’o Masepau (FAST)
Sili Epa Tuioti (HRPP) vs Matamua Vasati Pulufana (FAST)
Afamasaga Rico Tupai (HRPP) vs Toeolesulusulu Cedric Schuster (FAST)
Taueva Fa’afouina Sauvao (HRPP) vs Fesolai Apulu Tuigamala (FAST)
Salausa John Ah Ching (HRPP) vs Manuleleua P. Tovale (FAST)
Laufou Alofipo Manase (HRPP) vs Tuala Tevaga Ponifasio (FAST)
Tupa’i Avala Savainaea (Tautua Samoa ) vs Mulipola Anarosa Molio’o (FAST)
Afualo Dr. Wood Salele (Tautua Samoa) vs Fepuleai Faimata Sua (FAST)

Ata: O alii ma tamaitai loia sa tauina le taua Fuimaono Sarona Ponifasio,Tanya Toailoa, Lesa Afa Lesa, Shane Wulf ma Leiataualesa Jerry Brunt.

source

Tala sili ona faitaulia

TALA FOU MAI SAMOA

SAMOA UPDATE

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required