Ua teena ma faaleaogaina e le faamasinoga o faigapalota na tauaofia i le Aso Lulu le talosaga a se tasi o sui tauva o le palota tele ia Aperila lea na faamaonia lona faia o ni gaioiga faaalatua i moliaga na tuuaia ai a’o suesueina lana tagi o faatosina o le palota le afioga ia Afualo Dr Wood Salele.
O le tamaitai loia ia Magele Leone Mailo na ia finauina le talosaga a Afualo ina ia lē tuuina i totonu o le lipoti a le faamasinoga o le a tauaao atu i le fofoga fetalai o le Palemene le moliaga ua faamaonia i le mau sa faavae ai lea finauga o loo agavaa i le vaega 122 (2)(b)o le tulafono o faigapalota le afioga Afualo e fai ai sana tali tetee i le faamaonia o lona faia o ni faiga faaalatua poo le corrupt practice i le faamoemoe e faatosina ai le tagata palota.
I le faaiuga ua teena ai lenei talosaga ua faaalia ai e faamasino e toalua na tagofia le mataupu afai ae talia le talosaga o le avanoa lea e tatalo ai faitotoa ma lolofi atu ai i latou na faamaonia moliaga faapea ona o faatosina o palota e fia maua le isi avanoa e toe faia ai ni finauga tetee i o latou moliaga ua faamaonia.
O le faamanatu a le faamasinoga i le itu talosaga aemaise le Loia e le’o se moliaga ua faamaonia e faapea ai o se gaioiga tau solitulafono mamafa poo se criminal conviction.
O le ripoti a le faamasinoga pe a tauaao i le Fofoga Fetalai o le Palemene e tusa ai o faaiuga o mataupu i tagi o faatosina o le palota ua maea ona fofogaina e le gata o le a faailoa ai suesuega na faia i molimau na tuuina atu ae o le a faailoa ai foi ma faaiuga faasino i a’i latou ua faamaonia moliaga ma i latou ua lē faamaonia tuuaiga.
O le a aofia ai ma ni fautuaga i ni vaega e silasila le faamasinoga e ao ona faaleleia ma faia iai se fōfō. O le mataupu i le tagi tau palota a le itumalo o Salega No.1 na faatoai ai e Afualo Wood Salele tuuaiga o faatosina solitulafono e tuuaia ai le sui na manumalo le afioga i le Minisita Lagolago o le Matagaluega o Leoleo Falepuipui ma Galuega laveai i taimi o faalavelave faafuasei ma tineimu le afioga Fepuleai Faimata Su’a.
E le’i faamaonia ni moliaga a lē na tagi ae na’o le tuuaiga a lē na manumalo na faamaonia ma ua lē agavaa ai lē na tagi e toe tauva i se faigapalota e saili ai tofi o le Palemene. Ua faamauina foi le faamaonia o lea moliaga o le faia o faiga faaalatua i le lisi o faamaumauga o i latou ua latou soli lea tulafono
