Search
Search
O le Pule Faatonu poo le Regulator, Afioga Lematua Gisa Fuatai Purcell

Teena e le faamasinoga le aveesea o le Pule Faatonu mai le tagi o moliaga o le taufaaleaga

Ua lē talia e le Faamasinoga Maualuga le talosaga a le Pule Faatonu le afioga Lematua Gisa Fuatai Purcell, sa finau ai e lē talafeagai le molia o ia o le Pule Faatonu poo le Regulator, ae molia le Loia Sili e avea ma sui o le Malo.

Sa faavae lea finauga a le Pule Faatonu i finauga a ana loia o se King Counsel poo le KC ma se loia i totonu o Samoa.

O se aiaiga o le tulafono o le faalapotopotoga o le malosi tau eletise o loo faavae ai lea finauga a le itu tagi e ala atu i le talosaga e soloia ma aveesea le Pule Faatonu mai lea mataupu tau faamasinoga poo se Strike out motion.

O le Pule faatonu ia Lematua Gisa Fuatai Purcell o loo molia faatasi ai ma le nusipepa o le Samoa Observer i se tagi o se su ua faaulu e lē sa taitaifono faapea ma i latou sa seei i le Komiti Faatonu o le faalapotopotoga o le malosi faaeletise le EPC (Electric Power Corporation).

O i latou ia e aofia ai Fia’ailetoa Pepe Christian Fruean, Nuulopa Hill, Vaai Simon Potoi, Fuimaono Beth Onesemo, ma Tuautu Ross Peters.

O loo mafua le tagi a i latou, ona o se tusi a le Pule Faatonu na ave i le Minisita o le malosiaga tau eletise i le masina o Tesema o le tausaga e 2022 sa finauina ai e Lematua Gisa le faamalolo o le Taitaifono ma sui uma o le Komiti Faatonu o le EPC le faalapotopotoga o le malosi tau eletise.

I faamaumauga a le faamasinoga i le gagana Peretania o loo faailoa ai o Mati o le tausaga na tea nei 2023 na fautuaina ai le susuga Fia’ailetoa Pepe Christian Fruean e lē toe faafouina lona tulaga Taitaifono.

O le mae’a tuuina atu o le tusi a le Pule Faatonu na agiga ai i se manatu i faasalalauga a le nusipepa o loo molia vaega o lea tusi.

I le mae’a ona suesueina o le talosaga e soloia ma aveesea le Pule Faatonu ae tuu iai le Loia Sili e avea ma sui o le Malo e molia i le tagi, ua faailoa i le faaiuga a le faamasino le susuga Leiataualesa Darrel Clarke, ua lē faamalieina le faamasinoga i mau sa tuuina atu, ma ua teena ai le aveesea (strike out) o le moliaga o le taufaaleaga ma teena foi le aveesea o le Pule Faatonu.

O lona uiga ua faatumau pea ona molia le Afioga Lematua Gisa Fuatai Purcell i lona tulaga o le Pule Faatonu poo le Regulator.

E lei faatulagaina se aso e suesue ai lenei mataupu i tulaga aoao tetele i le Faamasinoga Maualuga.

Tala sili ona faitaulia

Tala mai samoa

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required