Search
Satiu Simativa Perese
Faamasino Sili - Satiu Simativa Perese, Photo: Samoa Global

Teena e le Faamasino Sili finauga a Tuilaepa ma Lealailepule ua ave i le faamasinoga

Ua lē talia e le Faamasino Sili le afioga Satiu Simativa Perese le naunau atu o le loia le afioga Aumua Ming Leung Wai ina faanatinati le tagofia e le faamasinoga sili o le talosaga a Tuilaepa L Sailele Malielegaoi ma Lealailepule Rimoni Aiafi, ua o la lu’i ai le faai’uga a le Palemene na talia ai le fautuaga a le Komiti o Tulaga Mamalu ma Aloa’ia a le Palemene ua faamālōlō lē tumau (suspend) ai le ta’ita’i o le Itu agai le sui faipule o le itumalo faapalota o Lepa, ma le failautusi o le pati faaupufai e puipuia aiātatau a tagata le sui faipule o Faleata 3.

O loo finau atu le itu talosaga ua afaina o la aiātatau i lalo o le Faavae i le faai’uga ua faamālōlō lē tumau ai, seia iai se aso (indefinite). Ae o loo finau atu le loia mo le Fofoga Fetalai le afioga Taulapapa Brenda Heather Latu, e lē mafai ona aiāina e le faamasinoga le faai’uga a le Palemene ona e lē feaiāa’i itutino e lua o le tafatolu fefaatauagai o le pulega, le faamasinoga ma le Palemene e aofia ai le pulega faatonu.

O le valaauina o le talosaga a le ta’ita’i o le Itu agai ma le faipue o Faleata 3 o lea ua faatulaga e su’esu’e i le aso 8 o Aokuso ae o le masina fou e tatau ona tapena atu ai loia a itu e lua i nisi o mau faaletulafono e lagolago ai finauga. Sa finau le loia a le itu tagi e fia faavavevave le mataupu ma aumai se faai’uga ona o loo faagasolo le talanoaina o le tala autu o le tupe, peitai e ioe le faamasinoga i le tāua tele o le auai o sui faipule e to’alua, ae o loo silasila foi le faamasino sili i le tāua o le tuuina atu o tapenaga i mau ‘anoa e faavae ai finauga ma faagasolo ai sailiiliga i se tulaga ma’eae’a ina ia mautu ai se faai’uga mulimuli.

O se alii loia mai fafo o le a galulue ma le ofisa loia o Aumua Ming Leung Wai mo le finauina o le mau a le itu talosaga, ae o le ofisa loia o Latu Lawyer ua finauina le itu a le Fofoga Fetalai o le Palemene. 

Tala sili ona faitaulia

TALA FOU MAI SAMOA

SAMOA UPDATE

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required