Rula Vaai
Rula Vaai

Tautino le tamaitai tusitala o ia e le’i lava tapena i le polokalame ma le Palemia Tausi

O se mataupu ua tele ina vevesi ai luga o upega tafailagi le Facebook ina ua faasalalauina se polokalame a le Palemia Tausi ma ofisa faasalalau lea na fesiligia ai e le tamaitai tusitala ia Rula Vaai le afioga Tuilaepa Lupesoliai Sailele Malielegaoi i sona manatu i lafoga na fai e Laauli Leuatea Polataivao Schmidt faasaga i tamaitai.

Peitai o le taeao nei lea na faamanino mai ai e Rula le tulaga o le mea moni na tulai mai i lea aso. Taua e Rula i luga o se polokalame faapitoa a le TV3 “o le mea moni a ia oute le’i sauni (which is) i le galuega faaletusitala sa le tatau ona tupu”.

“Sa ou taunuu atu, o’u saofai i lalo ona fesili mai lea o le Palemia tausi poo a mataupu o le a fesiligia ai o ia, ona o’u faalau lea iai, ona ia faimai lea o ia e fia malamalama tonu a i le saunoaga a Laauli na fai e masalomia ai le aafia o tamaitai, ona faimai lea o Tuilaepa e fai atu loa se fesili i le mataupu lena lea na fai ai loa la’u fesili ae tali mai ai loa Tuilaepa”.

Ina ua fesiligia Rula pe na matamata i le polokalame lea na fai ai le tala a Laauli tali Rula “ ou te le’i faalogologo i le polokalame ae na o’u faitau i ni tusitusiga i luga o ni fake pages ma oute lē alo foi i le ata o le laau, o a’u lea ua pa’ū ai le mataupu”.

O le vaiaso na tea nei na faamanino mai ai e Laauli e ala i sana faasalalauga i luga o le facebook e faapea ua faauiga sese foi e le toatele lana tala na fai ae o lana faaupuga na faatatau lea i tagata o loo faia le amio o le taufaaleaga ma le le mafaufau i luga o le facebook (fake pages) e ala i lafoga e lafo atu i le FAST ma ona sui.

Na ave le faamaualaloga a Rula i le mamalu o le atunuu aemaise le taitaifono o le FAST ia Laaulialemalietoa faapea le vaega faaupufai atoa ona o lea foi tulaga ua aafia ai le toatele ae le gata i lea o ni lafoga ua aafia ai tagata lautele.

I se faatalatalanoaga foi a lea sui o le TV3 Samoa Rula Vaai ma Tuilaepa i nai tausaga ua tuanai na fesiligia a le Palemia o lena taimi i le mataupu o le 10% o tamaitai i le palemene na saunoa ai Tuilaepa “Seiloga lava ua maua le aofai o tina e to’alima ae a sau a ua iai tina i totonu o le uluai 51 lea, ia e leai ni nofoa fou e toe faaopoopoa”.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required