Ua ta’utino se alii i lona fasiotia o lana paaga i lo latou fale i Perth, ona agai ane lea gaoi se pamu penisini ma lavea ai ma lana taavale.
O Steven James Alan Dean 37 tausaga na ia ioeina ona moliaga i le faamasinoga i Perth i le vaiaso nei.
O lē ua maliu o le tina e toalua lana fanau o Emmerich Lasakar 35 tausaga na maua atu e leoleo o manu’a tigaina i le fale i Perth i le masina o Aperila ma maliu ai mulimuli ane i le Royal Perth Hospital.
Sa pue e leoleo le alii lea ina ua lavea lana taavale ma o loo taofia nei e faatali ai le isi aso e tulai ai i le faamasinoga i le aso 28 o Aokuso.
Ua mae’a ona ta’utino foi Dean i moliaga o le taumafai e gaoi faaaupegaina ma le avetaavale faatamala, o soligatulafono na tutupu uma i le aso e tasi.
