Ua iai nei i Solomona le Tausala o Samoa le tamaitai o Litara Allan Ieremia mo le tauvaga e sa’ili ai se Tausala o le Pasefika, ae ua to’ai taunuu ai foi ma le tasi alo tamaitai o Samoa o loo tauaveina le pale o le Tausala o le Pasefika le tamaitai o Moemoana Safaatoa Schwenke.
O Moemoana o le a ta’imua i polokalame uma o le tauvaga o le sa’ilia o se Tausala o le Pasefika ma ia faapale foi le tamaitai o le a manumalo, ae o le Tausala o le atunuu ia Litara o le a tapena ma tuu atoa lona mafaufau i lana taumafaiga pe faamata o le a toe sola mai ma le pale o le Tausala o le Pasefika.
E valu atunuu ua auina atu o latou sui tauva mo lea tauvaga e amata i le aso muamua o Fepuari ae mae’a i le aso 8 lea e sa’ili ai le manumalo.
O atunuu ua taunuu o latou tausala mo le tauvaga o Amerika Samoa, Le Atu Kuki, Nauru, Kiripati, Papua Niu Kini, Samoa, Solomona ma Tonga.
