O le taeao nei, i le Aso Lulu, aso 22 o Fepuari 2023, lea na taunuu ai le faigamalaga a le Tamaitai Palemia o Samoa, Afioga Hon. Fiame Naomi Mata’afa, i le malaevaalele faavaomalo i Nadi.
O le faimalaga o loo fuafua e auai atu ai le Tamaitai Palemia i le fonotaga a ta’ita’i faapitoa o Atumotu o le Pasefika, le Pacific Islands Forum Special Leaders Retreat.
Na faatulaga le tulai faaaloalo a leoleo ma le vaega’au a le atunuu ma faafeao atu ai lana afioga i le Tamaitai Palemia o Samoa, ae faatalia mai e le tamaitai minisita, Hon. Lynda Tabuya, le Minister for Women, Children and Poverty Alleviation.
O le Aso Tofi ma le Aso Faraile, 23 – 24 Fepuari 2023, o le a amata usuia ai lea fonotaga a ta’ita’i o Atumotu o le Pasefika i Nadi, i Fiti, ma o le lona lima ai lea o fonotaga faapenei ua usuia.
O le fonotaga foi lenei ua fuafua e toe faafeiloaia ai le usugafono mai le atumotu o Kilipati, ma o le a faataunuuina le fonotaga i le Sofitel Hotel i Denarau i Nadi.
O tausaga taitasi e usuia ai le fonotaga a taitai o le Pasefika, le Pacific Islands Forum, ae pe a iai ni mataupu ogaoga ua moomia ona tagofia vave, ona usuia ai lea o se fonotaga e pei o le fono o loo auai atu nei i ai le Palemia o Samoa, lea ua ta’ua o le Pacific Islands Special Leaders Retreat.
O le Pacific Islands Forum o se faalapotopotoga e faatalanoa ai e ta’ita’i o le Pasefika a latou faiga faavae i mataupu tau polokiki ma le tamaoaiga, ma o le tausaga e 1971 na faavae ai lenei faalapotopotoga. E to’a 18 atunuu o le Pasefika o loo iai ona sui i totonu o lenei faalapotopotoga.
I le taimi nei, o lea ua faatulaga o le malo o Tonga o le a usuia ai le isi fonotaga e sosoo ai a ta’ita’i o atumotu o le Pasefika i le tausaga fou, 2024.
