Na faatumulia le malaevaalele i Faleolo i aiga, uo ma ē masani o le ausiisii u’amea mamafa a le atunuu ae lē gata i lea o tagata lagolago e tālia le taunuu i fanua o nisi o le autaaalo a Samoa na malaga atu i Burmingham mo Taaloga o Malo o le Taupulega.
O le ausiisii u’amea mamafa lea na tele ai pine na maua mo Samoa, 1 le pine auro mai le alii o Don Opeloge ma le 3 siliva mai ia Jack Opeloge, Vaipava Nevo Ioane ma Feagaiga Stowers.
Na auai atu foi i le malaevaalele le faia’oga a le ausiisii u’amea mamafa le afioga Tuaopepe Jerry Wallwork ma na ia ta’ua o le lagona lava o le fiafia ma le faagaeetia ua taunuu manuia le aumalaga ae lē gata i lea o le mata’ina o taumafaiga a alo ma fanau a le atunuu.
E ui e le’i maua uma ni pine auro e pei ona faamoemoe iai ae matua’i fiafia le alii faia’oga i taumafaiga uma faapea pine na faamanuiaina ai le to’atele o le ausiisii.
O le talosaga a Tuaopepe i le malo ina ia tautuana le sao o nai alo ma fanau pe e tatau ona maua ni a latou faamanuiaga mai le malo o Samoa.
Faailoa foi e le alii o Don Opeloge le agaga faafetai i le tapuaiga a Samoa lea na i’u manuia ai a latou taumafaiga i taaloga sa auai atu ai.
