Ua fesiligia e nisi o alii ma tamaitai leoleo o Malu o le Malo, poo fea o iai a latou seleni sa aveese ai le tai $2tala i o latou totogi e maua i le lua vaiaso, o se saofaga tau tupe e le faamalosia ae e tuu i le pule faitalia a le Malu o le Malo.
Ua faailoa e se alii leoleo o le a lē faailoaina lona suafa, ua fai e le Komesina le faaiuga e taofia loa le toe aveese o le tai lua tala, ma tapuni loa ma le teugatupe.
Peitai o loo fesili lea Malu o le Malo afai ua tapuni le teugatupe e tatau i le laulau poo le komiti faafoe ona faamalamalama atu pe fia se seleni atoa sa iai i le teugatupe, ae pe sa faapefea ona faaaoga, ae o ai foi o nofo aitalafu ai ae lei toe faaolaina pe toe totogi.
Ina ua tapa se finagalo o le afioga i le Komesina le susuga Auapaau Logoitino Filipo mo sona finagalo i le mataupu, na ia faamaonia mai ai e sa’o ua faia lana faaiuga e taofia loa ona toe aveese le tai 2 tala mai leoleo sa faapena ona ave a latou saofaga nei i lo latou loto malie, ma tapuni loa le teugatupe.
Ua faailoa mai foi e le Komesina ua na o leoleo e le o ni ofisa poo i latou o loo umia tulaga mai le leoleo e oo i le satini sinia e auai o ni sui o lea asosi, ae o Malu o le Malo ua ta’ua o Commissioner Officers e le lavea ai ma e le o ni sui foi o lea faalapotopotoga a alii ma tamaitai leoleo.
Ua faamaonia foi e le Komesina ua oo atu ia te ia ni faaseā i le mataupu, ae o lana fautuaga ua ave ia i latou ua faato’ai atu lagona ua utia i le mataupu lenei, e le mafai ona faia sana faaiuga i le faia o se suesuega, seia vagana ua tuuina atu se faaseā tusitusia.
O le tausaga e 2016 i le taimi o le komesina o leoleo ua faamavae, sa ia taofia ai le toe aveesea o ni seleni tai $10 tala mai totogi o leoleo mo le latou teugatupe o le social fund.
O seleni ia sa tua iai le pulega o le matagaluega i maliu o mātua ma taitoalua o leoleo e fai iai le latou faasoa peitai ua faaalia e Auapaau, talu ona le toe iai lea teugatupe ua saosao le vaega lava ia o le matagaluega mo se faalavelave tau maliu, seia vagana se Malu o le Malo e valaauina e lona Matai o loo galue pea, o le meatotino lea e palasi i le Matagaluega aoao.
