Ua faatulaga nei o le Aso Gafua 13 o Fepuari e valaau ai mo le taimi muamua, le talosaga a le Fofoga Fetalai o le Fono Aoao Faitulafono ua avea ai le Loia Sili a le Malo ma ona sui na te tuuina atu le mataupu mo se faaiuga a le faamasinoga sili, i le faamavae o sui faipule e toatolu le tofa Ale Vena Ale, Tuu’u Anasii Leota, ma Mau’u Siaosi Puepuemai, mai le vaega faaupufai e puipuia aiātatau a tagata.

O le faaiuga o le masina ua alu atu nei o Ianuari na faaulu atu ai i le faamasinoga lea talosaga, ma ua folasia ai e le Loia Sili mafuaaga o le tuuina atu i le faamasinoga mo sana faaiuga o lenei mataupu.

Ua faailoa i le talosaga lenei o le faamasinoga o loo aiaia i le Tulafono Faavae, na te faia se iloiloga faaletulafono i se faaiuga o se faipule poo ni faipule e faamavae pe faamaui ese mai lona toe avea ma sui o se vaega faaupufai, e tusa o le vaega 46 (3)(a)(1) o le Faavae, ma le vaega 141 (2)(a) o le Tulafono o Faigapalota o le tausaga e 2019. 

O loo faailoa foi i pepa tusitusia o lenei talosaga o le Fofoga Fetalai na te faia se moliaga e tusa o le vaega 141 (1) o le Tulafono o Faigapalota 2019 i le avanoa ai o le nofoa o se sui usufono ua faamavae pe ua faamaui ese lona toe avea ma sui o lana pati faaupufai.

O loo faaalia foi i le talosaga lenei, o loo iai le malosiaga faaletulafono i le Fofoga Fetalai na te tuuina atu ai i le faamasinoga mo se iloiloga ma se faaiuga pe a teena e se sui usufono lona moliaga.

E pei ona silafia o taualumaga a le fono aoao i le masina o Tesema o le tausaga na tea nei na faailoa lautele ai e sui faipule e toatolu ua molia, lo latou teena o moliaga.

Ua iai le talitonuga ua tapena sui faipule o Faleata Numera 4, o Siumu ma Vaa o Fonoti, e finauina a latou tali tetee e ala i se latou loia.

O loo finau le faipule o Faleata 4 i sona finagalo i auala o faasalalauga ina ua mae’a faalauiloa lautele lana faamavaega mai le pati faaupufai sa lagolago iai, ua aafia ma saisaitia lona aiātatau e filifili saoloto ai mai le faamavae ae see atu e avea ma faipule tutoatasi, ae e lei faamavae ae lagolago i se isi vaega faaupufai, e pei ona fai mai ai le aiaiga o le faavae ma le Tulafono o Faigapalota.