Ua taunuu i le laumua o le Atu Solomona o Honiara le vaega o le puipuiga a Niu Sila e fesoasoani i le faafoeina saogalemu o le faigapalota a lea atunuu ua fuafua mo le aso 17 o le masina nei lava.
Ua faamaonia e le ofisa o faigapalota a lea atunuu e 320 sui o le a aofia i le palota e aofia ai tamaitai e toa 19.
O le auai atu o le vaega o le puipuiga a Niu Sila ona o se vaega o le paketi fesoasoani a le malo mo faigapalota lea foi e aofia ai ma le auai atu o le vaa o le HMNZS Canterbury o loo aveina atu ai vaalele helicopters e lua a le Ea Fosi e faaaogā i le feaveaiina o pusa palota ma tagata faigaluega o le ofisa o palota i nofoaga eseese e faia ai.
Ua saunoa ai le taitai’au o le aumalaga e 200 ua auina atu i lea atumotu, Colonel Anthony Childs e faapea e vavalalata lava le sootaga o le Atu Solomona ma Niu Sila ma ua tuuina ane ai foi le valaaulia lea mo latou e fesoasoani atu ai i le faatinoina o se tasi o faamoemoe tāua i le atunuu.
O le vaega o le puipuiga a Niu Sila sa o latou ofoina foi le fesoasoani faatasi ma isi atunuu e pei o Ausetalia ma atumotu e pei o Papua Niu Kini ma Fiti mo le Atu Solomona a o talimalo ai i taaloga a le Pasefika i le tausaga na tea nei.
Puna o Faamatalaga: https://www.rnz.co.nz/international/pacific-news/513398/solomon-islands-election-2024-nzdf-in-honiara-to-support-the-democratic-process
