O le taeao nei na toe faaauau ai taulaumaga a le Palemene talu ona tolopō mai i le amataga o le vaiaso ma o se tasi o vaega muamua sa faailoa e le Fofoga o le maota afioga Papalii Li’o Taeu Masepa’u lona taulimaina lea o se faitioga tusitusia e aafia ai se mataupu tau tulaga aloaia  ma amio tauoloa e pei ona aiaia i le tulafono tumau 178 (1). 

O lea faitioga tusitusia  e tauala mai i se tasi o sui mamalu o le maota faasaga i nisi o sui usufono o le palemene. Saunoa le Fofoga Fetalai talu ai ona o tulaga aloaia o tōfiga faasui mamalu o le maota o le a lē mafai ai ona faailoa suafa o sui usufono o aafia i lea mataupu ona e tatau ona faamalieina le tulafono tumau. 

Faailoa foi e le Fofoga Fetalai ua maea ona tuuina atu e lē e ana le mataupu ia ata poo kopi o lenei faitioga tusitusia i sui usufono e faasaga iai, mo le silafia manino o lea mataupu. 

O lea ua poloaia ai e le Fofoga Fetalai sui mamalu o loo faasaga iai lenei faitioga ina ia tuuina atu tali tusitusia i le faitioga ua taulimaina ia lē silia le itula e 4 i le afiafi o le Aso Gafua  2 o Me 2022 mo lana iloiloga. A maea ona iloiloina e le fofoga fetalai le uiga o le faitioga pe ua aafia ai tulaga aloaia o le Palemene i le mataupu ua tuuina atu e ao lava ona faamalieina ma faatino manaoga faaletulafono o tulafono tumau o le maota. 

O le Aso 3 o le masina o Me 2022 o le a faasilasila aloaia ai luma o le Palemene le faaiuga a le Fofoga Fetalai pe ua aafia ai tulaga aloaia o le palemene i lenei mataupu. Na faasilasila alaoaia ai e Papalii i le Palemene o le a le mafai ona talanoaina pe faaali ai se finagalo o sui usufono ona sei maea ona faamalieina manaoga faaletulafono tulafono tumau 178 (2).