O le lipoti ua faamatuu mai e le Cyber Spy Agency a Ausetalia ua iloa ai o a’oga tulelei poo wealthy schools i Ausetalia, o i latou isi o loo taula’i mai iai osofa’iga i luga o upega tafa’ilagi.
Fai mai lipoti o faamaumauga o tamaiti aoga e aofia ai faamaumauga tau le soifua mālōlōina, faamaumauga tau le mafaufau e mafai ona gaoia i faiga nei ma faaaogā e maua ai tupe a le auosofa’i mai mātua o tamaiti.
O le ofisa lea a Ausetalia le Australian Signals Directorate poo le ASD o loo latou mata’itūina gaioiga a nei tagata e faia i upega tafa’ilagi ma ua mae’a ona o latou logoina leoleo e tusa o le i’uga o a latou su’esu’ega i le mataupu lea.
O nisi o loo mātele ona taula’i mai iai ia osofa’iga o faia’oga ma i latou e faia polokalame tau a’oa’oga aemaise foi le auaunaga tau felaua’iga ma isi.
Ua saunoa ai le minisita o feagai ma ia auaunaga Richard Marles o le aofa’i o lipoti ua maitauina i le lipoti lea e tali tutusa lava ma le tausaga na te’a nei ae ua vaaia le siisii pea i luga o tupe o loo alu ai aemaise o le ogaoga atu o aafiaga.
Ua fautuaina tagata ta’ito’atasi ma pisinisi ia aua ne’i totogiina ni tupe i nisi o le au hackers ia ona e leai se faamaoniga o le a toe maua ane ni faamatalaga latou te gaoia.
Puna o Faamatalaga: https://www.9news.com.au/national/private-schools-extortion-targets-for-cyber-criminals-warns-asd/90dc442d-84e9-4c75-9f2a-3995b1115ad3
