I le savalia ai nei o le 48 tausaga o galue ma tautua i le Malo, o se tasi o tinā o le atunuu, le afioga Peseta Noumea Simi o loo faauluulu iai le Matāgaluega o le Va i Fafo ma Fefaataua’iga, ua faailoa e le Malo le tauaao e le Kapeneta o lana faamavaega tusitusia, ma ua talia ai e le Kapeneta.

O se tasi o tiute o le afioga ia Peseta Noumea Simi a o le’i faamavae, o lona auai e avea ma sui aloa’ia o le Malo o Samoa i le fono a Minisita o le Va i Fafo a Malo o le Pasefika sa usuia i le masina na te’a nei i le atunuu o Fiti.

Advertisement

Ua faailoa i se faasalalauga mai le Ofisa Sooupu o le Malo e lē faavaea faasalalauga ma lipoti na masua mai i fafo i le Aso Lua o lenei vaiaso e faatatau i le faamavaega a Peseta, ona o le Komisi o Galuega a le malo na tauala atu ai le tusi faamavae i le Kapeneta.

I le faasalalauga mai le Ofisa Sooupu o loo faaalia ai, “E amana’ia ma faaaloalogia tele e le Malo tulaga aoaotetele o matāupu e fitoitonu i tagata faigaluega a le Malo, ma e li’oli’o i le puipuia o māfua’aga e ala ai faamavaega mai galuega ma tofiga a le Malo.

“I le taliaina ai o le faamavaega a le afioga i le Ofisa Sili o Pulega, o le a faatino tulaga masani o faamanuiaga uma e agavaa iai e tusa ma aiaiga o lana Konekarate faigaluega, atoa ai ma faiga faavae a le Malo.

“O le agaga faafetai o le Malo e lē faaitiitia i le tautua matavela a le afioga ia Peseta i tausaga e tele, sa ia punoua’i ai i tofiga eseese i totonu o le Itu Ma’oti o Tupe, atoa ai ma lona tauaveina o le tofiga o le Ofisa Sili o Pulega o le Matāgaluega o le Va i Fafo ma Fefaataua’iga talu mai le 2015”.

O le tausaga e 1979 na ulufale ai Peseta Noumea Simi e galue i le Malo a o Palemia le tōfā Tupuola Efi, ma o se vaitau e lē galo ae manatua pea auā na tula’i mai ai le solo tetee tele a tagata faigaluega o le Malo i le tausaga e 1981.

Sa tautua o ia i le Matāgaluega o Tupe se’ia oo ina see ane i le Ofisa o le Va i Fafo ae taunuu ai i le tofia e avea ma faauluuluga o lea auaunaga a le Malo i le tausaga e 2015.

O le tausaga ua mavae i le masina o Aokuso na toe filifilia ai e le Malo tausi a le tama’ita’i Palemia, le afioga Fiame Naomi Matā’afa e toe avea o ia ma Ofisa Sili o lea Matāgaluega.

E faamavae le afioga Peseta Noumea Simi ua toe lua tausaga o loo totoe o lana konekarate e pei ona sa toe filifilia ai e le malo tausi ia Aokuso o le tausaga na te’a nei.