O se tasi lenei o vaega autu o le faamanatuina o le vaiaso o faafafine i le atunuu e pei ona iai le fonotaga a le faalapotopotoga o le asosi a faafafine ma faatama i Samoa.

O le manatu autu o lenei fonotaga e agai lea i aiātatau ma le naunautaiga ina ia faasoa ma talanoaina mataupu auā le agai i luma o le atinaeina o lenei faalapotopotoga faatasi ai ma auaunaga e ao ina malamalama ai sui o le asosi.

Saunoa le Peresitene o le faalapotopotoga ia Alex Su’a e tusa ai o lenei faamoemoe.

“O mataupu na talanoaina i le fonotaga i tausaga ua mavae e tele lava ina talanoa i auaunaga e lē o silafia e o matou sui.

“Mo se faataitaiga o auaunaga o loo ofoina e le maota gasegase, o le Samoa Family Health o clinics i uta i le falema’i e fai ai siaki.

“O nisi foi o tulaga e pei ona iai faatama, e iai lava mataupu e musu e talanoa ai e pei la ona iai nisi o auaunaga ma e faafetaia ai lava o tatou tagata o le malamalama foi i o matou tagata.”

O le tausaga lenei ua mafai ona auai mai nisi o sui mai faalapotopotoga o faafafine mai le Pasefika aemaise nisi o atunuu e aofia ai Amerika.

“O le tausaga la lenei ua amata ona matou lē toe talanoa na o matou ae ua faalautele le talanoa i le Pasefika ona o le tulaga o le maualuga o le silasila foi a nisi o atunuu o le Pasefika ia Samoa e pei e aspire matou ona o matou lava le asosi mai Samoa na amatalia ona faatino ni mea faapea.

“Ona o polokalame ma faamoemoega a le asosi matou te o lava e saili i latou e mafai ona maua ai le fesoasoani e faatino ai nei vaega uma.

“O le molimau ola lea o loo vaavaai ma mata mai foi a matou galuega aemaise o la matou tautua o loo faia i le atunuu.”

O se tasi o polokalame o lenei fonotaga e aofia ai folasaga mai nisi o faafafine o loo mataina lo latou sao i nisi o atinae i le atunuu.

O loo faatupeina lenei polokalame e tauala mai i le fesoasoani a le Ofisa o Malo Aufaatasi.